Recuperación de contas xestionadas

Peneira permite que o profesorado cree contas educativas cun nome de usuario e sen enderezo de correo electrónico. Son contas xestionadas: o alumnado pode solicitar axuda desde a pantalla de acceso, pero é o profesor responsable quen xera e lle comunica o novo contrasinal.

Este procedemento é só para contas sen correo

Se a conta usa un enderezo de correo electrónico, Peneira envía a ligazón de recuperación a ese enderezo e non intervén o profesor.

1. O alumno solicita a recuperación

1. Na pantalla de acceso a Peneira, preme Lembrar contrasinal.
2. Introduce o nome de usuario da conta e preme de novo Lembrar contrasinal.
3. Peneira avisa de que a solicitude foi enviada ao profesor responsable.
4. O alumno contacta co profesor para recibir o novo contrasinal. Peneira non pode enviarllo directamente porque a conta non ten correo electrónico.

O alumnado introduce o nome de usuario; non é preciso coñecer o correo do profesor.

2. O profesor abre a xestión de participantes

Se o profesor responsable ten correo en Peneira, recibirá un aviso coa solicitude e unha ligazón ao proxecto. Tamén pode chegar manualmente:

1. Abre o proxecto no que participa o alumno.
2. Entra en Xestión de usuarios.
3. Busca a conta polo nome de usuario.
4. Preme a icona Restablecer contrasinal (un cadeado cunha frecha) na fila do alumno.

A acción só aparece nas contas sen correo que pode xestionar o profesor actual.

3. O profesor xera e entrega o novo contrasinal

1. Confirma Restablecer contrasinal.
2. Copia o contrasinal novo que mostra Peneira.
3. Entrégallo ao alumno por unha canle privada e segura.
4. O alumno xa pode iniciar sesión co nome de usuario e o novo contrasinal.

A captura usa un contrasinal ficticio. Copia o contrasinal real antes de pechar o diálogo.

O contrasinal anterior deixa de funcionar inmediatamente

Non publiques o novo contrasinal nun grupo, foro ou aula virtual compartida. Se pechas o diálogo sen copialo, terás que facer outro restablecemento. O alumno pode cambialo máis tarde desde o seu perfil.

Quen pode restablecelo?

• O profesor que creou a conta xestionada.
• Un superadministrador de Peneira.
• A conta debe continuar no proxecto desde o que se realiza a operación.

Nas contas antigas nas que non consta o creador, Peneira asigna como responsable o propietario do proxecto máis antigo ao que pertence a conta. Se a conta non pertence a ningún proxecto, debe intervir un superadministrador.

Se non aparece a icona de restablecemento

Comproba que:

• a conta usa un nome de usuario sen @;
• es o profesor responsable desa conta;
• o alumno continúa no proxecto aberto.

Se todo é correcto e a acción segue sen aparecer, contacta coa administración de Peneira indicando o proxecto e o nome de usuario, pero non envíes contrasinais.